Þingrefir

Þingmennirnir þutu á brott,

þegar tæmt var staupið.

Lögðu niður loðin skott

og laumuðust burt, með kaupið.

Magnús Teitsson

Siggi, Mangi og Bensi-Þór

Við kabyssuna Siggi sat

og sína spennti út anga.

Hann var að sjóða hundamat,

handa sér og Manga.

Þó að aldan þyki stór

og þreyti margan rokið,

það batnar þegar Bensi Þór

bleytir á oss kokið.

Magnús Teitsson

Grímur á kvartilinu

Yfir bjartan bárupart

berst með hjarta ólinu,

grætur vart þó gangi ei hart,

Grímur á kvartilinu.
Magnús Teitsson

Á veiðum

Orðin hvetur ófeiminn,

og þess getur harmþrunginn:

„Hrafninn étur háfinn minn,

hann var betur ófenginn".
Magnús Teitsson

Landshöfðingjagotið

Baróninn sér brá á flot,

burði hefur nóga.

Landshöfðingja látið got

lika fór að róa.
Magnús Teitsson

HREKKUR

Landshöfðinginn lá og svaf,
lítið vissi um hrekki.
Drengurinn fór á dauðans kaf,
en Drottinn vildi hann ekki.
Magnús Teitsson

FALLINN HRYSSA

Mig vill stanga mæðan skörp,
mér finnst langur skaðinn,
Ólafur svangur étur Jörp,
ég má ganga í staðinn.
Magnús Teitsson

HRINGJARINN Á STOKKSEYRI

Einum færra í okkar hóp,
ekki er lengi að muna,
Gamalíel hokinn hljóp
að hringja á kerlinguna.
Magnús Teitsson

ANDLÁTSFREGN

Ella á Mýrum er nú dauð,
önd og fjöri rúin.
Heimurinn gleypir hennar auð,
hún var efnum búin.
Magnús Teitsson

VÍNARBRAUÐIN

Gerið skemmdi gaddurinn, 
glerharðindi vóru. 
Hörmung var það, Hannes minn, 
hvernig brauðin fóru.
Magnús Teitsson

Jón Guðmundsson

Jón á sjóinn setur far,

sonur tjáist Guðmundar

Borg er frá án búskapar,

í blóma sá er æskunnar.
Brynjúlfur Jónsson

Jón með háa hugprýði,

hlutar snilldarlega.

Þessi frá er Framnesi,

fáki ráar stýrandi.
Símon Dalaskáld

Stýra sunda mæki má,

mikið snilldarlega,

er Guðmundar sonur sá

síldar grundu djarfur á.
Símon Dalaskáld

Japa sunda jarðar hrings

Jón Guðmundar arfi,

meður lunda báru bings

beitir á grundu hafrennings.
Steingrímur Ólafsson

Jón Guðmundar arfinn er,

á Framnesi býr hann,

hvals á grundu greiðast fer,

geira lundar höpp ei þver.
Steingrímur Ólafsson

Framnes-Jón um foldar hring,

fer í happa vonum,

laus við tjón í landnyrðing,

lukkan þjónar honum slyng.
Hofs-Gísli

Hvals á frón inn hugdjarfi,

hlunna ljóni stýrandi,

gildur þjónar gæfunni

gætinn Jón í Framnesi.
Magnús Teitsson

SÍMON

Símon hefur beislað bæði

Bakka- og Flóamenn.

Lætur hanga á leyniþræði

lengi og marga í senn.
Magnús Teitsson

SORGARINN

Miðlar guði af málunum

með því þjóðin launi.

Sorgarinn fyrir sálunum

situr á Stóra Hrauni.
Magnús Teitsson

LÝSIS-GRÓA

Heims úr nauða hýsinu,

hirti Drottinn Gróu,

létti þá á lýsinu

hjá Lénharði og Jóu.
Magnús Teitsson